Deklarasyonê Newroze: Wayîrê îradeyê aştîye vejîyê 2025-03-11 14:23:11     AMED - Deklarasyonê Newroza 2025ine ke Amed de ame eşkerakerdiş, wina ame vatiş: “Newroza emserî, Newroza pawitişê azadî û aştîye ya Rayberê Şaran yê birêz Abdullah Ocalanî ya.”   Roşanê Newroza 2025î bi pêşengîya Partîya Herêmanê Demokratîk (DBP), Partîya Têduştî û Demokrasîyî ya Şaran (DEM) Partî, Kongreya Komelo Demokratîk (KCD) û Tevgerê Cinîyanê Azadan (TJA) do bêro pîrozkerdene. Bi tewrbîyayîşê Hemserê Pêroyî yê DEM Partî Tuncer Bakirhan, Hemserekê Pêroyî yê DBP’yî Çîgdem Kiliçgun Uçar û Keskîn Bayindir, Hemserekê KCD’yî Berdan Ozturk, aktîvîstê TJA’yî, parlamenterê DEM Partî Mehmet Kamaç û Sînan Çîftyurek vernîya Sûranê Amedî de Berê Mardînî de deklarasyonê Newroza 2025î ame eşkera kerdene.   Deklerasyonê Newroze yê bi sernameyê “Newoza Raybero Azad û Komelo Demokratîk” wina yo:   “Newroze seba şarê Kurdî nameyê xoverdayîş, azadîye û zayîşî yo. Her çend dewletî hewl danê ke nê manayî çarçewayêka tenge de bigîrê dest zî, rastîya Newroze xoverdayîş û azadî ya. Şarê Kurd bi seserran xoverdayîşê xo adirê Newroze de geş kerdo. Nê adirî de estbîyayîş, xoverdayîş û azadîya xo mojnayo. Newroze ewro îfadeya tewr xurt yê rayîrşîyayîşê azadîya şarê ma yo. Coka her veng ke qadanê Newroze ra berz beno, her adiro ke yeno wekerdene, her kilama ke yena vatene, her govenda ke yena girewtene, îradeyê pawitişê azadîya ma yo.   Ma eşkenê pîya cuyêka azad awan bikerê   Manaya tewr girde ya ganîkerdişê ruhê Newroze ewro çarçewaya azadîya şarê Kurdî de hîrakerdişê xoverdayîşê aştî û komelo demokratîkî yo. 27ê sibate de Rayberê Şaran seba viraştişê cuya hempare û aştîya birumetî reyna vengdayîşêko tarîxî û bihêz kerd. Ma do nê vengdayîşê Rayberê Şaran reyde heqîqetê azadîye yê Newroze bikê yew û reyna nîşan bidê ke ma eşkenê pîya cuya azad û seypê awan bikê.   Ma emser Newroze bi sloganî ‘Raybero Azad Komelo Demokratîk’ pîroz kenê. Newroza emserrî Newroza pawitişê îradeyê azadî û aştî yê Rayberê Şaran Rêzdar Abdullah Ocalan a. Bi seserran o ke şar û bawerî rastê her tewir dej û azaran ameyê. Mîyanê şaran de dej û azarê tewr pîlî zî şarê Kurd ant. Sebebê dejê Kurdan o ke mîyanê tarîxî de awan bîyo, qanûnê înkar yê modernkerdeyî û polîtîkayê îqtîdaran ê ke komelê ser o yê. Seba ke înkarkerdişê şaran bivindarno, polîtîkayanê tedayî biqedêno û komelo demokratîk awan bikero, Rayberê Şaran berpirsîyarîyêka tarîxî gêno milê xo ser. Seba ke bieşko na berpirsîyarîya tarîxî bîyaro ca, ganî bilez azadîya fîzîkî û şert û mercê xebata azade ya Rayberê Şaran bêrê garantîkerdene. Amadekerdişê şert û mercanê xebate yê hêzê ‘Teorîk û Pratîkî’ hewcedarîyêka şexsî ra zêdêr wezîfeya bicaardişê berpirsîyarîya komelkî û sîyasî ya.   Ma eşkenê pîya meşeleya azadî berz bikerê   No vengdayîşê cuyêka edîl û seypê ya şaran, bawerîyan, cinîyan, ciwanan, domanan, kedkaran û teqawitan ganî bi ked û xoverdayîşê her kesî bêro berzkerdene. Azadî û şorişê cinîyan o ke bi xoverdayîşê Rehşanan, Ronahîyan, Zekîyeyan, Bêrîvanan reyna vejîyayo, ewro zî bi felsefa Jin Jiyan Azadî bîyo adirê Newroze. Xoverdayîşê cinîyan ê vera polîtîkayê îşxalkerî yê şerê taybetî, vera hukmê camêrdî û netewe-dewlete de do viraştişê aştî û komelo demokratîkî de berpirsîyarîya tewr pîle bigîro milê xo ser û komelkîbîyayîşê aştî birêxistin bikero û bipawo.     Şorişê Rojawanî geş bî   Şorişê Rojawanî roşnîya ewroyêne ya ruhê azadîye ya Newroze ya. Sistemê demokratîkî yo ke Rojawanî de ameyo afirnayene, şaro neteweyê demokratîkî yo ke esasanê azadîya cinîyan û seypêya azad a şaran ser o awan bîyo. Sîstemê Rojawanî sey Newroze sembolê xoverdayîş û zayîşî yo. La dewamkerdişê nê destkewteyan û garantîkerdişê ameyoxê şarê ma tena bi hîrakerdişê xoverdayîşî mumkin o. Sey adiro ke Kawayê Hesinkarî vera Dehaqê zalimî wekerd, ewro zî rayîrê pawitişê şorişê Rojawanî berzkerdişê meşaleyê xoverdayîşî yo.   Yewîya Neteweyî ya Kurdan   Cewherê Newroze îradeyê şaran ê cuyêka têreyde, azad û seypê yo. Newroze îfadeyê ziwan, reng û bawerîyanê cîyayan a ke cuyêka seypê û hempare ser o kom benê. Coka Newroze rastîya tarîxî ya ke her cîyayîye eşkenê têhet kom bibê. Komelo demokratîk û aştîya birumete, bi ruhê xoverdayîşî yê Newroze gird beno. Ewro rayîro tewr bihêz; vîrarkerdişê nê erjan, girdkerdişê xoverdayîşo rêxistinbîyaye, awankerdişê komelo demokratîk û garantîkerdişê yewîya neteweyî ya.     Şarê Kurd ke Kurdîstan û heme dinya de xoverdayîşê xo domneno, her tim bîyo sembolê xoverdayîş û zayîşî. Garantîkerdişê yewîya neteweyî do nê xoverdayîş û têkoşînî ver bi serkewteyanê girdêran bero. Hêzê hegemonîkî yê merkezî bi hemkarîya hêzanê herême wazenê ke Rojhelatê Mîyanênî de fermananê neweyan awan bikê. Coka seba Kurdan damê neweyî yenê amadekerdene. Şarê Kurd do seserrêka bîne zî bi fermananê teberî nêro rayberdiş. Şarê Kurd qerar dayo ke bi paradîgmaya komelo demokratîkî xo birêxistin biko û fermanê ke Kurdîstanî hetê erdnîgarî û fikrî ra parçe keno, orte ra wedarno. Şarê Kurd do naye zî bi xurtkerdişê yewîya neteweyî biyaro ca. Şarê Kurd her tim îradeyê xo yo awankerdişê ameyoxî bi erjê xoverdayîşî yê verênan reyde qadanê Newroze de mojnayo. Wextê averberdişê nê erjan de şarê Kurd rastîya komelkî xo rê esas girewta. Coka yewîya neteweyî seba şarê Kurd û seba şar û bawerîyê Rojhelatê Mîyanênî hewcedarîyêka bingeyine ya. Eger yewîya neteweyî ya Kurdan bêra ca, do hacetê zextî yê dewletan dest înan ra bêrê girewtene. Goreyê ruhê Newroze şarê Kurd do reyna îradeyê xo yê hempar yê azadîye seba xurtkerdişê yewîya neteweyî; dewe, kuçe, şaristan, serê koyan û qadan de nîşan bido.   Ma Newroza Rayberê Şaran pîroz kenê   Newroza 2025î do biba qonaxê girdkerdişê xoverdayîş û azadîye. Do Komelo Demokratîk bêro awankerdene û xoverdayîş do aver şêro. Adirê Newroze do bi ruhê yewîya neteweyî, bi vengê berzkerdişê azadîya fîzîkî ya Rayberê Şaran û xoverdayîşê dewamkerdişê şoreşa Rojawanî hîna geş bibo.   Ma Newroza Rayberê Şaran pîroz kenê ke ey hewl dayo Newroze prosesêka wina manadar de pêşwazî bikero û ma hêvî kenê ke şar bi coşê Newroze bêro têhet. Ma ciwan, cinî, kedkar û heme şarê xo bi kelecanê azadîye silaynenê pîrozbayîya Newroze. Newroze qada hêzê tewr xurt yê têkoşînî ya. Ma bi ruhê azad ê Newroze, Newroza heme şarê xo pîroz kenê. Newroze pîroz bo.”