‘Ganî kurdkî bibo ziwanê perwerdeyî’ 2025-03-10 15:00:34     AMED - Sazgehê Ziwanê Kurdkî ke piştî danê mesajê Rayberê Şarê Kurdî Abdullah Ocalanî wina va: “Ma zî sey heme hêz û dormeyanê kurdan ê azadîwaz û aştîwazan vanê ke vengdayîşê Rêzdar Ocalanî eynî wextî de vengdayîşê ma yo, ma heta peynî ey reyde yê û seba ke mesajê ey biresê peynî ma do heta peynî têkoşîn bikê û bixebitê.”   Sazgehanê Ziwanê Kurdkî reyde Sazgehê demokratîkî seba piştîdayîş û wayîrvejîyayîşê “Vengdayîşê Aştî û Şarê Demokratîk” yê Rayberê Şarê Kurdî Abdullah Ocalanî, awanîya MED-DER ya qezaya Peyasî ya Amedî de çapemenî rê beyanat da. Endam û îdarekarê Sazgehanê Ziwanê Kurdkî û Sazgehanê demokratîkan beşdarê beyanatî bîyî. Beyanatî de pankartê bi kirmanckî û kurmancî “Statuyê Kurdkî Perwerdeyê Bi Kurdkî” ameyî akerdene.   Kurmancîya beyanatî hetê endamê Komeleya Ziwan û Kulturî yê Birca Belekî Cahît Akil û yê Kirmanckî zî Hemsereka MED-DER’î Şukran Yakut wend.     Beyanat de bale dîya vengdayîşê Rayberê Şarê Kurdî Abdullah Ocalanî û wina ame vatiş: “27ê sibata 2025î ra Rêzdar Abdullah Ocalan bi nameyê “Vengdayîşê Aştî û Şaro Demokratîk” gamêka tarîxî ya demê newî eşte. Na gama tarîxî seba têkoşînê azadîya şarê kurdî daraxêka newîye ya tarîxî ya. Amancê na game seba bingeyê azadîye, bi hawayêko mende viraştişê aştîyêka birumete û awankerdişê şarê demokratikî yo.   Venngdayîşê Ocalanî   Bêguman aştîyêka birumete û şarêko demokratîk bi azadîya estbîyayîş, ziwan, nasname, bawerî, kultur, cinî û erjê netewa kurd û heme neteweyî, pê bawerîyanê bînan ê cîyayan mumkin o. Seke Rêzdar Ocalanî vengdayîşê xo de vano: “Rêzgirewtişê nasnameyan, azadîya fikrî, rêxistinbîyayîşê demokratîk, awankerdişê komelkî, ekonomî û sîyasî yê heme endaman tena bi estbîyayîşê komelkî û qada sîyasî ya demokratîke mumkin o.” No seba ma kurdan zî wina yo. Mîyanê na seserre de sebebê bingeyin yê têkoşînê şarê kurdî bî. Her tewir hovîtî ke ziwanê kurdkî ser o yê, ganî orte ra wedarîyê û her qada ciwîyayîşî de bi ziwanê xo û heme erjanê xo yê neteweyî û komelkî azad biciwîyo.   Ziwan muhîm o   Ganî baş bêro zanayene ke nêzdîbîyayîşê ziwanê kurdkî eynî wext de nêzdîbîyayîşê aştî, azadî û demokrasî nîşan dano û nêzdîbîyayîşê vengdayîş û hewldayîşanê rêzdar Ocalanî yê aştî û şarê demokratikî nîşan dano. Bêguman nêzdîbayayîşê Rêzdar Ocalanî û vengdayîşê ey ê aştî û şarê demokratîkî zî nêzdîbîyayîşê ziwanê kurdkî nîşan dano. Seba ney ma zî sey heme hêz û derûdorê kurdan ê azadîwaz û aştîwazan, vanê ke vegndayîşê Rêzdar Ocalanî eynî wext de vengdayîşê ma yo, ma heta peynî ey reyde yê û seba vatişanê ey ma do heta peynî têkoşîn bikê û bixebitê. Wa biciwîyo ziwanê kurdkî. Wa biciwîyo ciwîyayîşo azad. Wa biciwîyo aştîyêka birumete û şaro demokratîk!”   Peynîya beyanatî de sloganê “Bê ziwan ciwîyayîş nêbeno” ame berzkerdene.   Sazgehê ke piştî dayî beyanatî wina yê:   "* Enstîtuya Kurdî ya Amedê - Amed   * Enstîtuya Kurdî ya Stenbolê - Stenbol   * Komeleya Lêkolînên Çand û Ziman a Avestayê - Îzmîr   * Komeleya Parastin û Pêşvebirina Zimanê Kurdî (KURDÎGEH) - Wan   * Komeleya Lêkolînên Çand û Ziman a Botanê - Sêrt   * Komeleya Lêkolînên Çand û Ziman a Feradê - Semsûr   * Komeleya Lêkolînên Ziman û Çandê ya Arî-Derê - Êlih   * Komeleya Lêkolînên Ziman û Çandên Mezopotamyayê (MED-DER) - Amed   * Komeleya Navenda Lêkolînên Ziman, Çand û Hunerê ya Arsîsayê - Erdîş   * Komeleya Wêjekarên Kurd - Amed   * Komeleya Ziman û Çandê ya Birca Belek – Cizîr/Şirnex   * Komeleya Ziman, Çand û Hunerê ya ANKA - Enqere   * Komeleya Zimanê Kurdî (CUDÎ-DER) - Silopiya/Şirnex   * Komeleya Ziman û Wêjeyê (MEDYA-DER) – Tetwan /Bedlîs   * Kovara Destarê - Amed   * Komeleya Ziman, Çand û Hunerê ya Konê (KON-KULTUR)"