Îran de hemverê tedayan yewîya cinîyan xurt bena 2025-02-21 10:51:03     Melîke Aydin   ÎZMÎR - Femînîste aktîvîsta Îranî Elnaz Sarbar, dîyar ke cezaya dardekerdişî ke Pexşan Ezîzî û Werîşe Muradî rê ameya birnayîş, hewldayîşê pelçiqnayîşê xoverdayîşê cinî yo û vat, no zext cinîyanê Îranî û kurdan zêdeyêr ano têhet. Elnaz Sarbar sewbîna vat; kesê girêdayeyê hukmatê Îranî welatê bînan de hewl danê zextan meşrû bikerê û vat, ganî komelê mîyanneteweyî nê bivîno.   Reaksîyonê hemverê cezaya dardekerdişî ya Pexşan Ezîzî û Werîşe Muradî rê ameya birnayîş, dewam kena. Rêxistinê heq û komelê sivîlî dîyar kenê ke ganî lezkî na ceza bêro betalkerdiç. Çapemenîya dîjîtale ser bi etîketê #StopExecution kampanya ame destpêkerdiş û xeylêk welatan ra aktîvîstan paştdayîş dayî kampanya.   Aktîvîsta Îranî Elnaz Sarbar derheqê babete de ercnayîş kerd.    ‘Goreyê huqûqê mîyanneteweyî ganî tu ceza nêgîrê’   Elnaz Sarbar vat goreyê edaletî têbigêrê Pexşan Ezîzî û Werîşe Muradî rê tu ceza nîna birnayîş û vat: “Semedo ke sîstemê qanûnî yê Komara Îslamî ya Îranî, vernîya her çî bingehê şerîetî ser o ya. La ê hurmet nêdanê heqê merdiman ke azadîya dînî pawenê û cîyayîyê bingehê cins û meylê cinsî ser o keno. Heqaret, dîn ra vejîyayîş û hemcinsî hema zî  Komara Îslamî de suc ê. Sewbîna eke kesêk semedê mendişê Dewleta Îslamî 'tehluke' bêro vînayîş, gonîya ê kesî 'helal' a û goreyê sîstemê qanûnî yê Komara Îslamî eşkenê bênetîce bêrê rijnayîş.”   ‘Hukmkerdiş hetê adîlbîyayîş û zelalî de qels o’   Elnaz Sarbar wina vat: “Hukmê Îranî hetê adîlbîyayîş û zelalî de qels o. Xeylêk dewayî şarî rê akerde nîyê. Tepişteyê sey Pexşane û Werîşe vernîya roniştişî xeylêk tepişte manenê û îşkence înan rê yeno kerdiş. Bi hawayêk bandor avûkatî nêeşkenê xo biresnê dewaya her di cinîyanê cesûran. No zî mojneno ke hemverê înan de delîlêk somut çin o. Îran de her kes heqê prosesê hukmkerdişê adîlane de bêpar o. Cinîyê Îranî hetê komara îslamî ra hedef yenê girewtiş. Demê peyîn de têgêrayîşê ‘jin jiyan azadî’ komare tersnayo. Komara îslamî cezaya dardekerdişî dana cinîyan û zilm kena. bi nê wazena cinîyan bitersno.”   ‘Îran vernîya ke ci ra haydar bo hêzêk awan kerdo’   Elnaz Sarbar wina dewam kerd: “Îran vernîya ke ci ra haydar bo, hêzêk awan kerdo. Polîtîkaya zextî ya cinîyanê kurdan ser o, amancêk xurt da qezenckerdiş. Ma qerarê dardekerdişê lêşîn û bêedalet vînenê. Ma cinîyanê Îranî şermezar kenê. Tepişteyê cinî yê Evîne semedê cezaya dardekerdişî protesto bikerê kewtê grevê vêşanîye. Cinî hemverê rejîmê zextwerd cepheyê vernî yê têkoşînî de yê. Ganî komelê mîyanneteweyî hemverê nê de bêveng nêmano. Ganî rîyê rast yê Îranî bivînê û bimojnê. Ganî vindertişêk xurt hetê komelê mîyanneteweyî ra bêro mojnayîş. Kesê ke girêdayê hukmatê Îranî yê welatê bînî hewl danê zextan meşrû bikerê. Ganî komelê mîyanneteweyî nê bivîno.”