‘Ma do wayîrê kede û têkoşînê pakrewanan vejîyê’ 2025-02-04 11:04:17      Mîdye Miqted   HELEB - Cinîyê Helebî derheqê têkoşîn û xoverdayîşê Viyan Soran de dayî zanayîş ke 19 serrî yo serê şehadetê pakrewane Viyan Soran ra derbaz beno û vat: "Heta ke ma taqîbkerdoxê rêça pakrewanan bibê, ganî ma wayîrê kede û têkoşînê pakrewanan vejîyê."   19 serrî fedaîtîyê pakrewane Viyan Soran ser o derbaz beno. Semedê yadkerdişê aye her hîrê taxê Şêxmeqsûd û Eşrefîye yê bajarê Helebî kombîyayîşî ameyî organîzekerdiş, her hîrê taxî heyê Endamê Komîteya Perwerdeyî ya Kongra Star cuya pakrewane Viyan Soran ser o qisey kerdî. Xeylêk çalakî semedê serrgêra Viyan Sorane ameyî organîzekerdiş. Cinîyê ke tewrê bernameyê semedê  Viyan Soran bîyî ercnayîş kerdî. Cinîyan ercnayîşê xo de sozê wayîrvejîyayîşê keda pakrewananê azadîye dayî.    'Semedê azadîye canê xo feda kerd'   Endama Koordînasyonê Kongra Star ya bajarê Helebî Role Mihemed wina qisey kerd: "Viyan Soran, semedo ke komploya mîyanneteweyî ke Raber Abdullah Ocalanî ser o ame kerdiş û veng veja, xo veşna. Semedê heskerdişê aye yê welat û Rayberê xo dir, eynî wextî de semedê resnayîşê şarê kurdî yê ver bi azadîye, canê xo feda kerd."   'Viyane têkoşînêk bierc kerd'   Derheqê şexsê pakrewane Viyan Role wina dewam kerd: "Pakrewane Viyane wayîrê cesaretêk bêhempa bî. Wareyê leşkerî de fermandar bî. Hemverê dişminê şarê kurdî de tekoşînêk zaf bierc kerd û mohrê xo da şorişê şaran ro. Semedê vengvetişê komploya mîyanneteweyî çalakîya fedaî kerd. Bi xêrê fedaîtîya pakrewane Viyane ewro bi hezaran cinî cayê xo wareyê leşkerî û pêro wareyan de gênê. Ma soz danê ke ma do rêça pakrewanan dewam bikerê. Ma do têkoşînê xo berz bikerê, hetê ma biresê azadîya fîzîkî ya Rayber Abdullah Ocalanî."   'Ma do wayîrê kede û têkoşînê pakrewanan vejîyê'   Derheqê eynî babete de Zeyneb Xelîl zî wina vat: "19 serrî serê şehadetê pakrewane Viyan Sorane ra derbaz beno. Pakrewane Viyan Soran semedê azadîya Rayber Abdullah Ocalanî canê xo feda kerd û bî nimûneya temamê cinîyanê azadan. Heta ke ma taqîbkerdoxê rêça pakrewanan bibê, ganî ma wayîrê kede û têkoşînê pakrewanan vejîyê."   'Ma do wayîrê fedaîtîyê qehremanan vejîyê'   Zeyneb Xelîl zî wina qal kerd: "Bêmerge Viyane mektuba xo de vatibî; 'Felsefeya Rayberî roşnîya şewanê tarî ya' ma zî vanê ke adirê canê Viyane, bî roşnîya rêça ma. Ma nameyê Viyan Soran da tutanê xo wa û ma înan şirawitî mîyanê refanê şervananê azadiya Kurdistanî. Ewro keda pakrewananê ma semedê ma bî mîrasêk. Ma do tim rayîrê înan ser o bê. Semedê wayîrvejîyayîşê keda bêmerganê xo, ma do her tim wayîrê fedaîyê qehremanan vejîyê. Heta ma biresê azadîya temamê cinîyan û sere de azadîya fîzîkî ya Rayberê Şarê Kurdî Abdullah Ocalanî.”