Meclîsê Weşîye yê Helebî: Hêrişî dewam kenê dinya bêveng a

2025-01-22 10:45:14


	 

	Mîdye Miqted

	 

	HELEB - Meclîsê Weşîye yê bajarê Helebî reaksîyon vera hêrişê serê nobedaranê Awbendê Tişrînî mojna. Hemsereka Meclîsê Weşîye Leyla Hesen ke hêriş şermezar kerd, qiseykerdişê xo de venga dewletê mîyanneteweyî û rêxistinê heqê merdiman kerd ke hemverê nê hêrişan de bêveng nêmanê.

	 

	Hêriş û kerdişê dewleta tirkan hemverê nobedaranê Awbendê Tişrînî û kesê ke semedê paştdayîşî şinê dewam kenê. Netîceya nê hêrişan de vernîya di rojan na dewlete kesê ke semedê awbendî nobete girewtêne û konvoya ke mîyan de endamê Meclîsê Weşîye, ambulans, rojnameger, cinî, tutî, kal û pîr û sewbîna hunrmendî zî estbî ke semedê paştdayîşî ver bi awbendî de şîne, kerdî hedef û bi desan kes qetil kerdî û birîndar kerdî. Meclîsê Weşîye yê bajarê Helebî reaksîyon vera hêrişanê dewleta tirkan mojna.

	 

	Hemsereka Meclîsê Weşîye yê bajarê Helebî Leyla Hesen ke reaksîyon vera hêrişan mojna, destpêkê qiseykerdişê xo de wina vat: "Ma hêrişê dewleta tirkan a îşxalkere serê awbendê Tişrînî û bi taybetî hedefgirewtişê şarî, bi şîdet şermezar kenê. Ewro dewleta tirkan, temamê qanûnê merdimayî vînî kerd hêrişê şarî, rojnemegeran û ambulansan kena û dewletê mîyanneteweyî zî çimanê xo nê hêrişan ra pada yê û bêveng mendê."

	 

	'Dewletê mîyanneteweyî ça de yê' 

	 

	Dewamê qiseykerdişê xo de Leyla bale ant serê hêrişê rojnamegeran û wina vat: "Dinya de ma pêro zanê ke ganî rojnemegerî hedef nêrê girewtiş û nêrê qetilkerdiş. Labelê rojnemegerê kurdî hedefgirewtişî dir rî bi rî yê. Sewbîna ambulansî zî nînê hedefgirewtiş. Labelê ambulansê ma wexto ke awbendê Tişrînî ra birîndaran derbazê nêweşxane kerdêne, hedef girewtî û hêriş kerdî. Dewletê mîyanneteweyî hemverê dewamkerdişê nê hêrişan de ça de yê? Dewleta tirkan bi nê hêrişan nêeşkena ma çin bikera û peynîya ma bîyara.”

	 

	'Ma venga Xaçê Sûrî danê’

	 

	Tewr peyîn Leyla vengdayîşê xo semedê dewletanê mîyanneteweyî kerd ke bi wezîfeyê xo wurzê û wina vat: "Ma venga rêxistinê heqê merdiman û xaçê sûrî kenê ke vengê xo hemverê nê hêrişan de berz bikerê. Ganî nê sazgehî hemverê hêrişên ke şarî ser o yenê kerdiş, bêveng nêmanê. Eke bêveng bimanê do rayîr ver bi dewleta tirkan bêro akerdiş û do tewr zêde hêrişê sivîlan bikerê.”