‘Hemverê zîhnîyetê şerî modelê Rojawanî lazim o’ 

2024-12-23 11:22:36


	 

	 

	STENBOL - Aktîvîste Zuhal Kaygisiz da zanayîş ke çeteyê HTŞ û SMOyî semedê şarê Rojhelatê Mîyanên tehlukeyêk pîl ê û ganî her kes hemverê nê  zîhnîyetê şerî de modelê Rojawanî nimûne bigîro û her cayî de têkoşîn pîl bikero.

	 

	Rejîmê Baasî yê 61 serrî yê Sûrîye badê hêrişê ke Heyet Tahrir el-Şamî (HTŞ) 26ê teşrîna peyêne de da destpêkerdiş, kewt. Tirkîya û Artêşa Azade ya Sûrîye (SMO) girêdayeyê aye badê nê Vakur û Rojhelatê Sûrîye hedef girewtî. Tirkîya hêrişê xo dewam kena û xoverdayîşê şarê Rojawanî yê hemverê hêrişan dewam keno. Hêrişê HTŞ û SMOyî yê ke bi serkêşîya Tirkîya dewam kenê, destkewtişê pêro şaran û cinîyan keno tehluke.

	 

	Aktîvîst Zuhal Kaygisiz derheqê babete de ajansê ma rê qisey kerd.

	 

	‘Ganî ma pêro paştdayîş bidê vindertişê şarê Rojawanî’

	 

	Zuhal Kaygisiz dîyar kerd ke HTŞ û SMO bîyayîşê pêro şaran kenê tehluke û wina vat: “HTŞ û SMO zîhnîyetê DAIŞî ra cîyayêr nîyê. DAIŞ ke 2011ine de cinîyanê kurdan û êzidîyan hedef girewt û her tewir teda, îşkence û desteştiş kerdî. Texrîbatê DAIŞî yê cinîyan kurd û êzidîyan ser o hema zî dewam keno.  Rojawan de nika bîyayîşê şarî binê tehlukeyêk pîlî de yo. Ma zanê ke no rejîm wazeno xo cinîyan ser o bîyaye bikero. Ma nê qebûl nêkenê û ganî ma pêro paştdayîş bidê vindertişê şarê Rojawanî.”

	 

	‘Wazenê bawerî û şaran çin bikerê’

	 

	Zuhal Kaygisiz wina dewam kerd: “Fehmêk yewpawitiş est o. Binê nameyê îslamî de wazenê sîstemê camêrdan awan bikerê. No sîstem wazeno ke pêro kultur, bawerî, dewlemendî û şaran çin bikero. No zîhnîyet bîyayîşê êzidî, suryanî, kurd, xiristiyan çin hesibneno. Ma nê çî qebûl nêkenê û destur nêdanê. Rojhelatê Mîyanên de aştî û kulturê şaran yeno çinkerdiş. Wazenê ke yew tîp merdim awan bikerê.”

	 

	‘Do hişmendîyê demokrasî tewr zêde qels bibo’

	 

	Zuhal Kaygisiz qiseykerdişê xo wina qedêna: “Bi bîyayîşê HTŞ û SMO rejîmêk vînî kerd. Nika no sey destkewtişêk pêşkêşê şaran yeno kerdiş. Ma hemverê şerî yê. Do cîhadîstî xo na herre ser o bimojnê. Do hişmendîyê demokrasî qels bibo. Merdimê ke demokrasî ra bawer kenê, do bêrê sînorkerdiş. Ma nê çî qebûl nêkenê. Nê semedî ra ganî ma yewbînan pê bigîrê û yewîya şaran her tim bipawê.”