7 serran de koçberîya diyîne: NY çira bêveng o?

2024-12-12 09:20:53


	 

	RIHA - Efrînijê ke Şehba de bî, netîceya hêrişê Tirkîya û hêzê girêdayeyê aye de reya diyîne mecbûrê koçberîye bîyî. Îdarekara Rêxistina Heqê Merdiman ê Efrîn-Sûrîye Zeynep Suleyman derheqê babete de qisey kerd û da zanayîş ke do şar bi hêzê pawitişî xo ver bidê û vat: “NY ça de yo, çira bêveng o?”

	 

	Heyet Tehrir el-Şam (HTŞ) 26ê teşrîna peyêne de hêrişê Heleb, Humusî kerd û xeylêk bajaran kerd binê kontrolê xo. Netîceya hêrişê HTŞyî de Şam  kerdî binê kontrolê xo û rejîmê Baasî 8ê kanûne de kewt. Tirkîya û komê paramîlîterî yê girêdayeyê ci, nê sey îmkan dî û hemverê herêmê binê kontrolê Îdarekarîya Xoserî de hêrişî dayî destpêkerdiş. 

	 

	Tirkîya 2018ine de hêrişê Efrînî kerd û netîceya hêrişan de bi des hezaran efrînîjî kampê Şehbayî de bica bîyî. Se hezarî ra zêdeyêr efrînîjî Şehba de bîyî. La Tirkîya û komê girêdayeyê aye hêrişê HTŞyî xo rê kerdî îmkan û dest bi hêrişan kerd. Hemverê hêrişan de Yewîneyê Pawitişê Şarî xo ver danê.

	 

	Îdarekara Rêxistina Heqê Merdiman ê Efrîn-Sûrîyeyî Zeynep Suleyman derheqê hêrişanê Tirkîya û komê paramîlîterî yê girêdayeyê aye de qisey kerd.

	 

	Reya diyîne koçber bîyî

	 

	Zeynep Suleyman dîyar kerd ke di rey koçber bîyê û vat: “Çîyê ke wextê peyîn de ameyî ciwîyayîş, hêrişê  2018ine yê hemverê Efrînî hîn zêde xerab bîyî. Semedo ke xeylêk hetan ra hêrişî estbî. Bi hezaran kesî dewanê Şehbayî ra vejîyayî û hewl dayî ke derbazê wareyê biasayîş bibê. Ver bi Tebqa, Reqa, Minbiç, Kobanê, Dêrikê ke binê Îdarekarîya Xoserî de bî şîyî. Nika yê Tebqayî hewl yeno dayîş ke bêrê bicakerdiş.”

	 

	‘Şehba de nika 30 hezar kes est o’

	 

	Zeynep Suleyman tewr peyîn wina vat: “Ma zî nika Tebqa de manenê. Waştişê şarî oyo ke derbazê herêmanê asayîşan bibê. Yê ke ma dir Şehba ra vejîyayî, mîyanê înan de cinîyê digane estbî. Yê ke wesayîtan de tutê xo ardî dinya estbî. Neteweyê Yewbîyaye (NY) çira bêveng o, ça de yo? Yê ke bêveng manenê, hemkarê nê sûcî yê. Çira her kes herême ra vejîya û çira sivîlî hêrişan dir rî bi rî mendî. Hêzê pawitişê şarî hemverê hêrişan de xoverdayîşêk pîl mojnenê. Nika Şehba de nêzdîyê 30 hezar kes est o. Rewşa înan zelal nîya. La ma do pîya hemverê hêrişan de xo ver bidê.”