‘Nê welatî de xora zêde zîndanî est ê’

2024-12-11 09:14:16


	 

	Elfazî Toral

	 

	STENBOL - Hemverfeka Herêma Diyîne ya DEM Partîye Gîzem Kuzuk derheqê malûmatê îqtîdarî yê derheqê viraştişê 21 zîndanî de qisey kerd û vat: “No welat de xora zaf zêde zîndanî est ê. Vera ke zîndanan rê butçe aqitnenê wa projeyê semedê weşîye û perwerdeyî rê zî biaqitnê.”

	 

	Rojê vîyarte de bi îmzayê serekkomarê AKPyî Tayyîp Erdoganî butçeyê serra 2025ine pêşkêşê meclîse ame kerdiş û goreyê serra vîyarte butçeyê wezaretê edaletî di kat û nîm zêde bî û vejîya 280 mîlyar û 275 mîlyon û 802. Wezîrê edaletî Yilmaz Tunçî pêvînayîşan de vat, Tirkîya de 406 zîndanî est ê û viraştişê 11 heban dewam keno û projeyê 21 zîndanan ser o zî şuxilênê.

	 

	Hemverfeka Herêma Diyîne ya Stenbolî ya DEM Partîye Gîzem Kuzuk derheqê babete de qisey kerd.

	 

	Gîzem Kuzuk wina qalê prosesî kerd: “Hetêk ra venga aştîye kenê û hetêk ra zî şer xidar kenê. Caardişê qeyûmî ke demokrasî binpay keno, mojneno ke çiqas demokrasî ra dûr kewtê. Heto bîn ra zî vatişê aştîye est o. Îqtîdarê sîyasî teberê welatî de şer xidar keno. Na babete çiqas cidî ya, ganî bêro munaqeşekerdiş. Ma zanê ke îqtîdaro sîyasî ameyo rewşêke wina ke tu hêvî nêdano şarî.”

	 

	‘Tu polîtîkayêke îqtîdarî hêvî bido nêmenda’

	 

	Gîzem Kuzuk derheqê projeyê 21 zîndanan de zî wina vat: “Îqtîdar xêrcê sozanê şerî û zîndanî tu hevî nêdano şarî. Polîtîka înan nêmenda. AKP waştişanê şarî nêvîneno. Ewro zîndanan de kapasîte ser o tepişteyî est ê. Îqtîdar viraştişê zîndanan sey mizginî neql keno. Mesajê ‘eke şima hemverê bêusulî vengê xo vejê, ma do şima pêrûne bişirawê zîndanan’ danê. Îqtîdar vano qey do xeta xoverdayîşê merdiman biqedêno la do nêeşko biqedêno.”

	 

	‘Şar zîndanê neweyan nêwazeno’

	 

	Gîzem Kuzuk reaksîyon vera viraştişê zîndanan mojna û vat: “Şar zîndanê neweyan nêwazeno. Ganî vera ci goş bido waştişê şarî. Merdimî vîneno ke ekonomî ameya çi rewşe. Nê welatî de xora zaf zêde zîndanî est ê. Vera viraştişê zîndanan wa butçe weşî û perwerdeyî rê biaqitnê.”