Semedê beşdarbîyayîşê mîtîngî hemverê feqîrî û qeyûman de vengdayîş 

2024-12-06 11:12:33


	 

	STENBOL - Hemsereka DEM Partîye ya Stenbolî Gonca Yangaz derheqê mîtîngê "Semedê cuyêka merdimayî" venga beşdarbîyayîşê cinî, ciwan, karker, kedkar, komanê bawerîyan rê kerd û vat: "Semedê cuyêka bi rumet, aştîyane û demokratîke awan bikerê, beşdarê mîtîngî bibê."

	 

	Hemsereka Partîya Têduştî û Demokrasî (DEM Partî) ya Stenbolî Gonca Yangoz derheqê mîtîngê "Semedê cuyêka merdimayî" do 8ê Kanûne de bi sloganê "Semedê şarî demokrasî, semedê şarî butçe" ke hetê Hêzê Kede, Aştî û Demokrasî ra Stenbol de bêro kerdiş, veng da.

	 

	Gonca Yangoz da zanayîş ke welat de şert û mercê merdimayî ke însanî ci de biciwîyê nêmendê û wina vat: “Hetêk ra feqîrî, hetêk ra şer, hetêk ra zî teda û  xespkerdişê heqan. Ma hemverê nê de yê û coka nê mîtîngî organîze kenê. Polîtîkaya şerî dir faşîzm, feqîrî giran bîya û ma hemverê nê caardişan û polîtîkaya qeyûmî venga mîtîngî kenê. Welat de  qetilkerdişê cinîyan, çinhesibnayîşê cinîyan, nêvînayîşê cinîyan û binpaykerdişê heqan zêde yo. Nê pêro girêdayeyê polîtîkaya şerî yê. Ma do vatişê xo mîtîng de vajê û têkoşînê xo pîl bikerê.”

	 

	‘Ma do bi têkoşînê hemparî zorê faşîzmî berê’

	 

	Gonca Yangoz dewam de wina qalî kerd: “Fehmêk faşîzmî yê xo ferz keno est o. Hedefo ke ma dayo xo ver, no yo. Ma do bi têkoşînê hempar hemverê nê de bibê veng û pîya vengê xo berz bikerê. Ma semedê mesajê ‘Ma do hemverê faşîzmî de têkoşînê hempar bikerê’ bidê û meydanê mîtîngî de bibê.”

	 

	Semedê mîtîngî vengdayîş

	 

	Gonca Yangoz tewr peyîn dîyar kerd ke noktaya xoverdayîşî de zî eke wareyê hempar bêro awankerdiş, do hêzê xo zêde bikerê û wina vat: “Faşîzm bi pêro çekan, ma ser de yeno. Ma zî hemverê nê de xeta têkoşînî ke ma qet fek vera nêdayo, dewam bikerê. Ma venga hemîne kenê ke  8ê kanûne de saete 14.00ine de mîtîng de bibê.”